ការប្រកួតបាល់ទាត់ពានរង្វាន់ជើងឯកតំបន់អាស៊ីអាគ្នេយ៍ផ្នែកបុរស ASEAN Mitsubishi Electric Cup ត្រូវបានប្តូរឈ្មោះទៅជា ASEAN Hyundai Cup វិញ។ ការប្តូរឈ្មោះនេះ ក្រោយពីមានការផ្លាស់ប្តូរដៃគូសហការឧបត្ថម្ភការប្រកួតជាមួយក្រុមហ៊ុនផលិតរថយន្តដ៏ល្បីរបស់កូរ៉េខាងត្បូង Hyundai នៅថ្ងៃទី២៦ ខែឧសភា។

ការប្រកាសធ្វើឡើង ពីសំណាក់សហព័ន្ធបាល់ទាត់អាស៊ីអាគ្នេយ៍ (AFF) ក្នុងសន្និសីទសារព័ត៌មានមួយក្នុងទីក្រុងហ្សាការតា ក្រោមវត្តមានរបស់លោក ខៀវ សាម៉េត ប្រធាន AFF និងតំណាងរបស់ក្រុមហ៊ុនសហការជាដៃគូឧបត្ថម្ភថ្មី។

ក្រុមហ៊ុនផលិតរថយន្តជាដៃគូសហការឧបត្ថម្ភថ្មី ក៏ចូលរួមឧបត្ថម្ភដល់ការប្រកួតពានរង្វាន់ចំនួន ៣ ផ្សេងទៀត ស្ថិតក្រោមការគ្រប់គ្រងរបស់ AFF រួមមាន Shopee Cup ពានរង្វាន់ក្លិបជើងខ្លាំងលំដាប់អាស៊ីអាគ្នេយ៍, MSIG Cup ពានរង្វាន់ក្រុមនារីតំបន់អាស៊ាន និងការប្រកួតបាល់ទាត់អាយុក្រោម ២៣ (​ASEAN U23 Championship)។ 
 

ក្រុមហ៊ុនផលិតរថយន្តដ៏ល្បីរបស់កូរេខាងត្បូង Hyundai ក្លាយជាក្រុមហ៊ុនទី៤ ដែលបានឧបត្ថម្ភដល់ការប្រកួតបាល់ទាត់កម្រិតអាស៊ាន បន្ទាប់ពីក្រុមហ៊ុន Mitsubishi Electric, Suzuki និងក្រុមហ៊ុនស្រាបៀ Tiger។

គួររលឹកថា នៅការប្រកួតពានរង្វាន់ AFF ASEAN Cup ឆ្នាំ ២០២៤ កន្លងទៅ កម្ពុជាធ្លាក់ចេញពីការប្រកួតត្រឹមវគ្គចែកពូល A ដោយរកបានត្រឹមតែ ៤ពិន្ទុ ពីការប្រកួតចំនួន ៤លើក ឈ្នះ ១ ស្មើ ១ និងចាញ៉ពីប្រកួត។ ក្នុងពានរង្វាន់កម្រិតតំបន់ ក្រុមជម្រើសជាតិកម្ពុជា ចាប់តាំងពីឆ្នាំ ១៩៩៦ ដល់ឆ្នាំ ២០២៤ ក្រុមរហស្សនាមគោព្រៃ មិនធ្លាប់បានឆ្លងផុតវគ្គចែកពូលឡើយ។

ការប្រកួត AFF ASEAN Cup ឆ្នាំ ២០២៤ ដដែលនោះ ក្រុមជម្រើសជាតិវៀតណាម ក្លាយជាជើងឯក ឆ្នាំ ២០២៤ និងលើកទី​៣ ប្រចាំប្រវត្តិសាស្ត្ររបស់ពួកគេ បន្ទាប់ពីយកឈ្នះលើក្រុមជម្រើសជាតិថៃ ជើងឯក ៧សម័យ លទ្ធផល ៥-៣ នៅការប្រកួតវគ្គផ្តាច់ព្រ័ត្រសរុបទាំងពីរជើងទៅមក៕