ភ្នំពេញ៖ សម្ដេច ហ៊ុន សែន ប្រធានព្រឹទ្ធសភា អះអាងថា ខឿនការពារជាតិកម្ពុជា មានភាពរឹងមាំខ្លាំង ខណៈដែលសម្ដេចសង្កេតឃើញមានចលនាឧបត្ថម្ភ ជាបន្តបន្ទាប់ រួមមានទាំងរដ្ឋាភិបាល វិស័យឯកជន សាធារណជនទូទៅទៅដល់កងកម្លាំងនៅតាមបណ្តោយព្រំដែន។
នៅព្រឹកថ្ងៃទី២៩ ខែឧសភានេះ សម្ដេច ហ៊ុន សែន បានថ្លែងសារពិសេស ពាក់ព័ន្ធនឹងស្ថានភាពព្រំដែនកម្ពុជា-ថៃ មួយថ្ងៃក្រោយការវាយឆ្មក់ទៅលើលេណដ្ឋានកងទ័ពកម្ពុជានៅភូមិតេជោមរកត ឃុំមរកត ស្រុកជាំក្សាន្ត ខេត្តព្រះវិហារ ដែលបណ្តាលឱ្យយោធិនកម្ពុជាមួយរូបទទួលមរណភាព។
ជាមួយគ្នានេះ សម្តេចមើលឃើញចលនាសប្បុរសធម៌នៃបណ្ដាក្រុមហ៊ុនធំៗក្នុងស្រុក ដែលបានស្នើសុំចូលរួម ជួយឧបត្ថម្ភដល់កងកម្លាំងការពារព្រំដែន។ តាមរយៈការជួយគាំទ្រជាស្បៀង អាហារ ថវិកា និងការលើកទឹកចិត្តផ្សេង ដល់កម្លាំងការពារតាមតំបន់ព្រំដែន សម្ដេចបន្តលើកទឹកចិត្តដើម្បីបង្កើនកម្លាំងចិត្តដល់កងទ័ព។
សម្ដេច ហ៊ុន សែន សង្កត់ធ្ងន់បន្ថែមបែបនេះ៖ «អ៊ីចឹង ខឿនការពារជាតិរបស់ប្រជាជនកម្ពុជា គឺខ្លាំងណាស់! ឥឡូវ កំពុងមានចលនា កម្លាំងទ័ពយើងកំពុងឡើងទៅជួរមុខ។ ការផ្គត់ផ្គង់ត្រូវតែមាន ពីរដ្ឋ ក្រសួងការពារជាតិ ពីគ្រប់ផ្នែក»។ ជាមួយគ្នាដែរ សម្ដេច ជំរុញឱ្យស្ថាប័នផ្សេងៗទៀត រួមគ្នាចូលរួមជួយឧបត្ថម្ភផងដែរ។
សម្តេចប្រធានព្រឹទ្ធសភា បានអំពាវនាវយ៉ាងដូច្នេះ៖ «សូមអំពាវនាវពលរដ្ឋរបស់យើង ចូលរួមដើម្បីជួយផ្គត់ផ្គង់។ យើងមិនខ្វះទេ ក៏ប៉ុន្តែយើងបង្ហាញពីសមានចិត្ត ដើម្បីបញ្ជាក់អំពីខឿនការពារជាតិរបស់ប្រជាជន ដែលជាយុទ្ធសាស្រ្ត របស់ ហ៊ុន សែន តាំងពីដើម»៕
