ភ្នំពេញ៖ ក្រសួងអប់រំ ប្រកាសរើសយុវជនប្រតិភូយុវជនចំនួន ១៦រូបចូលរូមកម្មវិធីនាវាយុវជនអាស៊ីអាគ្នេយ៍ និងជប៉ុន លើកទី៤៩(The Ship for Southeast Asian and Japanese Youth Program – SSEAYP)។ កម្មវិធីនេះ មានរយៈប្រមាណ១ខែ គឺចាប់ផ្តើមពីថ្ងៃទី១៥ ខែមករា ដល់ថ្ងៃទី១៧ ខែកុម្ភៈ ២០២៦ ដោយចូលចតប្រទេសគោលដៅចំនួន៣គឺជប៉ុន សិង្ហបុរី និងថៃ។
បើតាមការផ្សាយរបស់ក្រសួងអប់រំ ក្នុងកម្មវីធី SSEAYPនេះ មានពិភាក្សាប្រធានបទធំៗចំនួន៦ មានការអប់រំប្រកបដោយគុណភាព, កំណើនសេដ្ឋកិច្ច ទេសចរណ៍ដែលមាន ចីរភាព និងមានទំនួលខុសត្រូវ, បរិស្ថានសកល និងការប្រែប្រួលអាកាសធាតុ, ការកាត់ បន្ថយហានិភ័យគ្រោះមហន្តរាយ និងការស្តារឡើងវិញ, សុខុមាលភាពសង្គម និងបរិយាបន្ន និងសង្គមឌីជីថល និងបញ្ញាសិប្បនិម្មិត។
លក្ខខណ្ឌដាក់ពាក្យបាន គឺយុវជនត្រូវមានអាយុចន្លោះ ១៨-៣៦ឆ្នាំ មានចំណេះដឹងភាសាអង់គ្លេសល្អ, រួមទាំងចំណេះដឹងជ្រៅជ្រះទាកទងអាស៊ាន និងជប៉ុន និងមានសុខភាពល្អទាំងកាយ និងចិត្ត។ យុវជនដែលមានចំណាប់អារម្មណ៍ អាចដាក់ពាក្យចូលរួមក្នុងកម្មវិធីពីថ្ងៃនេះ រហូតដល់ថ្ងៃទី២ ខែមិថុនា ឆ្នាំ២០២៥។
កម្មវិធីនាវាយុវជនអាស៊ីអាគ្នេយ៍ និងជប៉ុន រៀបចំឡើងក្នុងគោលបំណង ដើម្បីលើកកម្ពស់មិត្តភាព និងការយោគយល់គ្នារវាងយុវជននៃប្រទេសជប៉ុន និងប្រទេសអាស៊ីអាគ្នេយ៍ទាំង១០ ដើម្បីពង្រីកទស្សនៈយុវជនអំពីពិភពលោក ក៏ដូចពង្រឹងស្មារតីនៃកិច្ចសហប្រតិបត្តិការអន្តរជាតិ និងជំនាញជាក់ស្ដែងសម្រាប់កិច្ចសហប្រតិបត្តិការអន្តរជាតិ៕
