ភ្នំពេញ៖ ក្រសួងទេសចរណ៍ នឹងរៀបចំ«បុណ្យផ្សោតមេគង្គ និងព្រឹត្តិការណ៍អុំទូកកៃយ៉ាក» លើកដំបូង រយៈពេល ៣ថ្ងៃ គឺពីថ្ងៃទី៣០-៣១ ខែឧសភា ដល់ថ្ងៃទី១ ខែមិថុនា ឆ្នាំ២០២៥ នៅ ២ទីតាំងស្ថិតក្នុង ឃុំព្រះរំកិល ស្រុកបុរីអេកូទេសចរណ៍ព្រះរំកិល ខេត្តស្នឹងត្រែង រួម​មានសហគមន៍អេកូទេចរណ៍ព្រះរំកិល និងអន្លង់ផ្សោតឈើទាល។

បើតាមការផ្សាយរបស់ក្រសួងទេសចរណ៍ ពិធីបុណ្យនេះមានរៀបចំ ៧ព្រឹត្តិការណ៍ធំ រួម​មាន ពិធីសូត្រមន្តបុណ្យផ្សោតមេគង្គ, កម្មវិធីអុំទូកកៃយ៉ាក, ការតាំងពិព័រណ៍ផលិត​ផល​សហគមន៍អេកូទេសចរណ៍ និងម្ហូបអាហារប្រចាំតំបន់។

នៅក្នុងពិធំបុណ្យផ្សោតមេគង្គនេះ ក៏នឹងមាន​សកម្មភាពកីឡាទេសចរណ៍​ជាលក្ខណៈ​មហាជនដែរ រួមមានការរត់ម៉ារ៉ាតុន ដើម្បីសប្បុរសធម៌ និងប្រណាំងទូកជាដើម។ ក្រៅពីនេះ ក៏មានរៀបចំនូវការបោះតង់ជំរំទេសចរណ៍ នៅលើកោះលន និងកោះទន្សាយ និងការធ្វើទស្សនកិច្ចស្តូបប្រវត្តិសាស្ត្របណ្ណាល័យហ្លួងម៉ែ ដែលស្ថិតនៅ សហគមន៍អេកូទេសចរណ៍បុរីអូរស្វាយ  ក៏ដូចជាទស្សនកិច្ចទឹកធ្លាក់សុភ័ក្រមិត្ត។

បើតាមក្រសួងទេសចរណ៍ ការរៀបចំ«បុណ្យផ្សោតមេគង្គ និងព្រឹត្តិការណ៍អុំទូកកៃយ៉ាក» លើ​ក​ទី១ គឺដើម្បីលើកកម្ពស់ការអភិរក្សផ្សោតមេគង្គ ផ្សព្វផ្សាយតំបន់សក្តានុពល​អេកូ​ទេសចរណ៍ សកម្មភាពទេសចរណ៍ និងពង្រឹងគុណភាពផលិតផល សេវាកម្មទេសចរណ៍​ឱ្យស្របតាមស្តង់ដា។ ពិសេសលើកទឹកចិត្តប្រជាពលរដ្ឋចូលរួមអនាម័យបរិស្ថាន អភិរក្ស​ធនធានធម្មជាតិ ដើម្បីទាក់ទាញកំណើនភ្ញៀវទេសជាតិ និងអន្តជាតិបន្ថែមទៀត។

បន្ថែមពីនេះបុណ្យផ្សោតមេគង្គ ជាព្រឹត្តិការណ៍រួមចំណែកជំរុញការផ្សព្វផ្សាយ និង​លើក កម្ពស់វិស័យទេសចរណ៍រដូវកាលបៃតង (Green season) ដែលរដូវកាលនេះ ​ចាប់ផ្តើម​ពី​ខែ​មេសា ដល់ខែតុលា ជាពេលដែលកម្ពុជាមានទេសភាពស្រស់ស្អាត និង​ធ្លាក់​ភ្លៀង​។

  «រដូវកាលបៃតង» (Green Season) ជាយុទ្ធនាការ​ដែល​ក្រសួងទេសចរណ៍ប្រើ​ដើម្បីដាក់​ជំនួសឱ្យពាក្យ «រដូវកាលភ្ញៀវតិច» (Low Season) ហើយ​ក៏ទទួលបាន​ការគាំទ្រ​យ៉ា​ងពេញទំហឹង​ពី​សម្តេច ហ៊ុន ម៉ាណែត ​ផងដែរ។​ «រដូវកាលបៃតង» (Green Season) ចាប់ពី​ខែមេសា ដល់ខែតុលា ដែលមានទេសភាពស្រស់ស្អាត និង​ធ្លាក់​ភ្លៀង​៕